АҚШнинг Нью-Йорк шаҳрида шахматнинг рапид йўналишида Жаҳон чемпионати бошланди. Бугун спортчилар дастлабки 5 та тур баҳсларини ўтказишди.

Мусобақада Ўзбекистондан 6 нафар шахматчи иштирок этаётгани ҳақида хабар бериб ўтгандик. Дастлабки 5 та ўйиндан кейин Нодирбек Абдусатторов ва Жавоҳир Синдаров 4 тадан очко жамғариб, етакчилар сафида боришмоқда. Абдусатторов 4 ғалаба ва бир мағлубият қайд этган бўлса, Жавоҳир 3 ғалаба ва 2 дурангга эришди.

Шамсиддин Воҳидов эса биринчи кунда 3 очко жамғарган бўлса, Жаҳонгир Воҳидов ва Муҳиддин Мадаминов мос равишда 2,5 ҳамда 2,0 очкони қўлга киритишди.

Аёллар мусобақасида иштирок этаётган Афруза Ҳамдамова ажойиб натижа қайд этмоқда. Ҳамюртимиз 4 та ўйиннинг иккитасиа ғалаба қозониб, иккитасида дуранг ўйнади. Афруза барча ўйинларда рейтингда ўзидан анча юқорида бўлган шахматчиларга қарши дона сурмоқда.

Мусобақада фаворити ҳисобланган Магнус Карлсен, кутилмаганда, беш ўйиндан сўнг бор-йўғи 2,5 очко тўплади.

Бугун тунда рапид бўйича яна 4 та тур баҳслари бўлиб ўтади. Рапид жами 13 та тур ўйинлари ўтказилади.