AQSHning Nyu-York shahrida shaxmatning rapid yo‘nalishida Jahon chempionati boshlandi. Bugun sportchilar dastlabki 5 ta tur bahslarini o‘tkazishdi.

Musobaqada O‘zbekistondan 6 nafar shaxmatchi ishtirok etayotgani haqida xabar berib o‘tgandik. Dastlabki 5 ta o‘yindan keyin Nodirbek Abdusattorov va Javohir Sindarov 4 tadan ochko jamg‘arib, yetakchilar safida borishmoqda. Abdusattorov 4 g‘alaba va bir mag‘lubiyat qayd etgan bo‘lsa, Javohir 3 g‘alaba va 2 durangga erishdi.

Shamsiddin Vohidov esa birinchi kunda 3 ochko jamg‘argan bo‘lsa, Jahongir Vohidov va Muhiddin Madaminov mos ravishda 2,5 hamda 2,0 ochkoni qo‘lga kiritishdi.

Ayollar musobaqasida ishtirok etayotgan Afruza Hamdamova ajoyib natija qayd etmoqda. Hamyurtimiz 4 ta o‘yinning ikkitasia g‘alaba qozonib, ikkitasida durang o‘ynadi. Afruza barcha o‘yinlarda reytingda o‘zidan ancha yuqorida bo‘lgan shaxmatchilarga qarshi dona surmoqda.

Musobaqada favoriti hisoblangan Magnus Karlsen, kutilmaganda, besh o‘yindan so‘ng bor-yo‘g‘i 2,5 ochko to‘pladi.

Bugun tunda rapid bo‘yicha yana 4 ta tur bahslari bo‘lib o‘tadi. Rapid jami 13 ta tur o‘yinlari o‘tkaziladi.