Европа чемпионлар лигасининг бу йилги мусобақасида Германия жамоалари тўқнаш келиши маълум бўлганидаёқ фаворит сифатида Мюнхеннинг «Бавария»сини кўрсатишаётганди.

Бироқ бир учрашувлардан иборат учрашувда бу борада бир нарса деб бўлмаслигини «Боруссия» исботлай олди. Биринчи бўлимда айнан Юрген Клопп бошчилигидаги жамоа кўпроқ ҳужум уюштирди. Кўпроқ вазият юзага келтирди. Бироқ гол киритиш на уларга ва на «Бавария»га насиб қилди.

Иккинчи бўлимда эса финалларнинг омадсиз футболчиси Арьен Роббен ўзини кўрсата олди. Аввалига айнан Роббеннинг узатмасидан кейин Марио Манжукич учрашувда ҳисобни очди. Бироқ кўп ўтмай, Бонфим Данте  Марко Ройсга нисбатан қўполлик ишлатди ва италиялик ҳакам Никола Риццоли мюнхенликлар дарвозаси томон пенальти белгилади. Пенальтини эса Илкай Гундоган аниқ амалга ошириб ҳисобни тенглаштирди.

Барчаси қўшимча дақиқаларга қоладигандек кўринаётган бир вазиятда ўша финалларнинг антиқаҳрамони Арьен Роббен бу сафар гол ҳам киритди. Энг муҳим, энг асосий голини киритди. Бу гол эса Хайнкесс жамоасига чемпионлар лигасига бош совринини келтирди.

Чемпионлар лигаси
Финал

БОРУССИЯ Д (Германия) – БАВАРИЯ (Германия) 1:2 (0:0)
Голлар: Гундоган (68, пенальти) – Манжукич (60), Роббен (89).
Боруссия Д: Вайденфеллер, Пишчек, Хуммельс, Суботич, Шмельцер, Гундоган, Бендер (Шахин, 90), Блашчиковски (Шибер, 90), Ройс, Гросскройтц, Левандовски.
Бавария: Нойер, Лам, Ж. Боатенг, Данте, Алаба, Швайнштайгер, Хави Мартинес, Роббен, Мюллер, Рибери (Л. Густаво, 90), Манжукич (Гомес, 90+3).
Огоҳлантиришлар: Данте (29), Рибери (74), Гросскройтц (74).