АҚШнинг Нью-Йорк шаҳрида шахматнинг рапид йўналишида Жаҳон чемпионати давом этмоқда. Бугун спортчилар навбатдаги 4 та тур баҳсларини ўтказишди.

Мусобақада Ўзбекистондан 6 нафар шахматчи иштирок этаётгани ҳақида хабар бериб ўтгандик. Нодирбек Абдусатторов ва Жавоҳир Синдаров бугунги 4 та ўйинда 2,5 тадан очко тўплашди. Натижада уларнинг очколари 6,5 тага етди. Ҳамюртларимиз пешқадамлардан 0,5 очко ортда қолган ҳолда мос равишда 7 ва 9-поғоналарни эгаллаб туришибди.

Жаҳонгир Воҳидов эса 5,5 очко билан 37-ўринни банд этган бўлса, Шамсиддин Воҳидов ва Муҳиддин Мадаминов 4 очко билан 120 ва 125-ўринларда боришмоқда.

Мусобақа фаворити Магнус Карлсен эса 8 турдан 5 очко тўплаганди. У 9-турдан бошлаб баҳсларда иштирок этмасликка қарор қилди.

Бугун тунда яна 4 та тур ўйинлари ўтказилади. 10-турда Синдаров россиялик Ян Непомняшчийга қарши оқ доналарда ўйнаса, Абдусатторов ҳам россиялик Денис Лазавик билан оқ доналарда ҳаракат қилади.

Аёллар мусобақасида иштирок этаётган Афруза Ҳамдамова яхши натижаларни қўлга киритишда давом этмоқда. Ҳамюртимиз бугун ўтказилган навбатдаги 4 та ўйинда 2,5 очко тўплади. Натижада Афруза 5,5 очко билан мусобақа жадвалида 15-ўринни банд этиб турибди.

Бугун тунда эркаклар 4 та, аёллар эса 3 та тур баҳсларини ўтказишади ва рапид мусобақаси якун ясашади.