Криштиану Роналду икки йилдан бери "Ан-Наср"да ўйнамоқда. Юлдуз португалиялик форварднинг Саудия клуби билан амалдаги шартномаси 2024/2025 йилги мавсум охиригача амал қилади. ФИФА қоидалари футболчиларга бошқа мамлакатлар клублари билан эркин музокаралар олиб бориш ва ҳатто шартнома муддати тугашига олти ой қолганда дастлабки шартномани имзолаш имконини беради.

Демак, 1 январдан бошлаб Роналду Саудия Арабистонидан ташқаридаги клублар билан мулоқот қилиш ва ҳатто кейинги мавсум учун кимдир билан меҳнат шартномаси имзолаш ҳуқуқига эга бўлади.

Олдинроқ матбуотда 39 ёшли Криштиану Роналду "Ан-Наср"да бахтли экани, бироқ бошқа жамоага ўтишини истисно қилмаётгани ҳақида маълумотлар пайдо бўлганди.