Россиялик чемпионнинг менежери Али Абдел-Азизнинг айтишича, Ислам ўзидан юқори ва пастдаги вазн чемпионларини мағлуб эта олади. У ҳатто яримоғир вазн тоифаси чемпиони Алекс Перейрани ҳам таслим бўлишга мажбур қила олар экан.
"Арман ҳақиқий йиртқич ва чақилмас ёнғоқ. Бир кун келиб у чемпион бўлади. Мен бунга ишонаман, лекин ҳозир эмас. Ҳали унинг даври келгани йўқ. У ҳали ёш. Бир нарсага аминманки, бугунги кунда енгил вазндан ўрта вазн тоифасигача ҳеч ким Исламни мағлуб эта олмайди. Унақаси ҳали дивизионларда йўқ. Енгил, ярим ўрта ва ўрта вазн тоифаларида Махачев исталган жангчини ва хоҳлаган кунда енга олади.
Исламнинг яримоғир вазн чемпиони Алекс Перейрани ҳам ютишига ишонаман. У бразилиялик чемпионни партерда таслим бўлишга мажбур қилади. Алекс Перейра Исламдан бошқа сайёрамизнинг исталган кишисини нокаут қила олади", - дея Абдел-Азизнинг сўзларини келтиради MMA Junkie.
