11 декабрь куни ОАВ билан бўлиб ўтган мулоқот давомида Лига стадионлар масаласига алоҳида урғу берган бўлиб, Жиззахдагии «Сўғдиёна» ва Намангандаги «Марказий» стадионида айрим муаммолар борлигига тўхталганди.

Намангандаги стадион майдони 2018 йил Лига талаб қилган кўринишга келтирилган, Жиззахдаги майдон эса 2023 йилги мавсумда бунга эришди. Бироқ ҳозирга келиб майдон парвариши масаласида Лигада хавотирлар мавжуд. Суперлиганинг сўнгги мавсуми охирига келиб ҳар икки стадион футбол майдонларида толиқишлар мавжуд эканлигини барча кўрди.

Мазкур ойда Лига раҳбарияти Наманган вилояти ҳокими билан учрашув ўтказган бўлиб, унда "Марказий" стадион ҳолатини яхшилаш масаласида сўз борган. Шунингдек, «Сўғдиёна» клуби раҳбарияти билан ҳам яқинда учрашув ташкил этилди. Ҳар икки майдон парваришига жиддий эътибор қаратиш, бу масалага етарлича маблағ ажратиш масалалари муҳокама қилинди. Ҳар икки томон муаммога тўғри ёндошса, Марказий ва «Сўғдиёна» яна аввалги ҳолатига қайтишига шубҳа йўқ. Ишонамизки, «Навбаҳор» ва «Сўғдиёна» бунга ечим топа олади.

Шундан келиб чиқиб, Лига ҳар икки стадионни шартли равишда рўйхатдан ўтказмоқда. Ташкилот ҳамкорлик қилаётган мутахассислар маҳаллий агрономлар билан кўнгилли сифатида ҳамкорлик қилиш ва майдонлар парвариши масаласида барча маслаҳатларни бериб боришга тайёр.