Зоминда бўлиб ўтган «Сўғдиёна» — «Динамо» (4:3) учрашувидан сўнг, ҳар иккала жамоа бош мураббийлари иштирокида матбуот анжумани ташкил этилди. Дастлаб, «Динамо» бош мураббийи вазифасини бажарувчи Равшан Ҳайдаров фикрлари билан ўртоқлашди.

— Бугунгидек шиддатли, томошабоп ўйиндан фақат мухлислар ютишади. Ўйинга тўхталадиган бўлсам, дастлабки ярим соатликда мезбонлар ўйин тизгинини ўзларида сақлашди. Аммо, қарши ҳужумда киритган голимиздан сўнг йигитларимизнинг ўзларига бўлган ишончлари ортди. Бироқ, иккинчи бўлим бошида жамоамиз ҳимоясида парокандаликлар юз берди ва бу учун рақиб бизни икки бор жазолади. Мувозанатни тиклаганимиздан сўнг, яна ҳужумларга зўр бериб бир қатор ҳужумлар яратдик ва ҳисобда яна олдинга чиқиб олишимиз мумкин эди, аммо бу сафар ҳам ҳимоя қўрғонимиздаги хатоликлар режамизни бузди ва яна тўплар ўтказдик. Иккита тўп фарқини йўқотиш учун эса бизга вақт етишмади.

— Ҳимоядаги муаммоларни қандай изоҳлайсиз?
— Бугун жамоамиз етакчиларидан бири Александр Клецков жароҳати боис бизга ёрдам бера олмади. Унинг ўрнига ҳали жароҳатидан тўла тузалиб кетмаган Аҳрол Рисқуллаевни майдонга туширгандик. Аммо, бу ҳимоячимиз спорт формасини тўлиқ тиклай олгани йўқ. Умуман, бугун «Динамо»нинг ҳам, «Сўғдиёна»нинг ҳам ҳимоя чизиғи яхши ўйин кўрсатди дейиш қийин. Чунки, ҳар икки жамоанинг ҳам ҳужум чизиғи муносиб ўйин намойиш этди. Айниқса, мезбон жамоа тезлик бобида биздан устун келди.

— «Динамо»дан давралар оралиғида қандай ўзгаришлар кутишимиз мумкин?
— Таркиб борасида ўзгаришлар қилишимиз аниқ. Чунки, жамоанинг ҳозирги натижалари Самарқанддек шаҳарга мос эмас. Ички имкониятларимиз катта деб ўйлайман. Шундай экан биз ишлашда давом этиб, камчиликларни таҳлил қилиб, муаммоларни бартараф қиламиз.