44 ёшли мураббий Стивен Жеррард тез орада бобога айланади. Унинг катта қизи Лили-Элла яқинда ҳомиладорлигини эълон қилди, деб хабар беради Daily Record нашри. "Ливерпуль" афсонасининг қизи 20 ёшда.

Эслатиб ўтамиз, Жеррард Саудия Арабистонида 2023 йилнинг ёзидан буён ишлаб келмоқда. У "Ал-Иттифоқ" футбол клубини бошқаради. У мураббийлик фаолиятини 2017 йилда бошлаган, "Ливерпуль" ўсмирларини бошқарган. Кейин Англия терма жамоасининг собиқ сардори ўзини "Рейнжерс" ва "Астон Вилла"да синаб кўрди. Собиқ ярим ҳимоячи футболчилик фаолиятини 2016 йилда МЛСда "Лос-Анжелес Гэлакси" таркибида якунлаганди. АҚШга кўчиб ўтишдан олдин Жеррард бутун фаолиятини ватани Ливерпулда ўтказди.