Микель Артета Габриэль Жезус жароҳатидан сўнг "Арсенал"нинг трансфер режалари ҳақидаги саволга жавоб берди.
Аввалроқ, ҳужумчи тиззасидаги олдинги хоч боғлами ёрилишида гумон қилинаётгани маълум бўлганди. Клуб Жезус мавсум охиригача майдонга тушмаслигидан хавотирда.
"Менинг жавобим ўзгармайди. Биз ҳар доимгидек жамоани кучайтириш учун бозорни фаол ўрганмоқдамиз. Бундай қилмаслик соддалик бўларди. Биз қидиряпмиз ва ҳаракат қиляпмиз - келинг, нима қилишимиз мумкинлигини кўрамиз.
Ўйинчи билан шартнома имзолаш учун учта томон рози бўлиши керак. Мен ўз футболчиларимни яхши кўраман, лекин бу биз кучайтириш ҳақида ўйлай олмаймиз дегани эмас. Биз ҳар куни ишлаймиз ва трансфер бозори очилганда биз ўзимиз хоҳлаган тарзда рақобатлаш учун энг яхши ресурслар ва имкониятларга эга эканлигимизга ишонч ҳосил қилишимиз керак" - деди "Арсенал" устози.
