Мадриднинг "Реал" клуби ҳимоячиси Давид Алаба бир йилдан ортиқ вақт ичида илк бор майдонга тушди.
Австриялик футболчи якшанба куни бўлиб ўтган Ла Лиганинг "Лас-Пальмас"га (4:1) қарши ўйинининг 76-дақиқасида захирадан майдонга тушди. Бу 32 ёшли футболчининг 2023 йилнинг декабрь ойидан буён илк ўйини бўлди.
"Бу туйғуни қанчалик соғинганимни айта олмайман. Майдонда, айниқса, стадионимизда бўлишни, жамоадошларимга ёрдам беришни, мухлислар билан байрам қилишни соғиндим. Бир йил ўтгач, мен яна бир бор дунёдаги энг яхши кўрган ишимни қила оламан. Бу узоқ йўл эди, лекин ҳар бир машаққатли меҳнатга арзийди. Қўллаб-қувватлаганингиз учун барчангизга раҳмат", - деб ёзди Алаба ўйиндан кейин ижтимоий тармоқда.
