"Барселона" "Реал" билан Испаниядан ташқарида ўйнаши мумкин.
Каталония клуби навбатдаги Ла Лига "Эл-Класико"сини мамлакат ташқарисида ўтказиш имкониятини ўрганмоқда. Бу ҳақда SER Catalunya телеканали хабар берди.
"Камп Ноу"даги ишлар ушбу ўйин учун ўз вақтида якунланмаса, бу вариант кўриб чиқилиши мумкин. "Барселона" бундай ўйинни сиғими катта ва энг яхши шароитга эга стадионда ўтказиш керак деб ҳисоблайди.
"Кўк-анорранглар" 11 май куни "Реал"ни қабул қилиши режалаштирилган. Каталонияликлар "Монтжуик" стадионидаги ижара муддатини апрель ойи охиригача узайтирди, аммо май ойида у ерда ўйнай олиши даргумон - у ерда бир қатор концертлар режалаштирилган, уларни бекор қилиш жуда қийин.
"Барселона" ҳали ўзининг Б режасини Ла Лига ёки Испания Қироллик футбол федерациясига (RFEF) етказмади, чунки улар "Камп Ноу" ўйинни ўтказишга тайёр бўлишига ишонишади. Ўйинни хорижга ўтказиш тўғрисидаги қарор ушбу ташкилотлар томонидан тасдиқланиши керак.
Клуб матбуот сўровига жавобан, бу вазиятда ҳали ҳам номаълумликлар жуда кўплигини таъкидлади.
