"Ал-Ҳилол" келаси ёз учун юқори даражадаги шартнома имзолашни режалаштирган.
Яқинда клуб жароҳати туфайли Саудия Арабистонида ўзини кўрсата олмаган Неймар билан шартномани бекор қилганини маълум қилди. Журналист Бен Жейкобснинг сўзларига кўра, бразилиялик футболчи кетганидан кейин "Ал-Ҳилол" янги суперюлдуз билан шартнома имзолаш учун сармоя киритиши мумкин бўлади. Асосий нишон - Муҳаммад Салоҳ. Мисрлик футболчининг "Ливерпуль" билан шартномаси июль ойида якунига етади.
"Қизиллар"нинг 32 ёшли ҳужумкор етакчиси Саудия Арабистонига ўтишга рози бўлса, дунёнинг энг кўп маош олувчи футболчисига айланиши мумкин. Форвард ҳали келажаги борасида якуний қарорга келгани йўқ ва "Ливерпуль" уни қолишга кўндиришга ҳаракат қилади.
Шунингдек, "Ал-Ҳилол" июнь ойида бошланадиган клублар ўртасидаги жаҳон чемпионати бошлангунга қадар топ трансферни амалга ошириш ниятида экани ҳам малум.
