Германиянинг Вайссенхаус шаҳрида "2025 Freestyle Chess Grand Slam" мусобақасида айланма тизими якунига етди ва бугундан плей-офф босқичи старт олади.

Спортчилар кеча рапид йўналишида яна 4 тадан ўйин ўтказишди. Синдаров ва Фирузжа 6,5 очкодан жамғаришди. Франциялик шахматчи қўшимча кўрсаткичлар бўйича биринчи ўринни эгаллади. Нодирбек Абдусатторов эса 3,5 очко билан 7-поғонани банд этди.

Қоидага кўра, айланма тизимда дастлабки 4 ўринни эгаллаган шахматчилар ўзлар учун рақиб танлаш имкониятига эга бўлишди. Танлов натижасида қуйидаги жуфтликлар юзага келди:

Алиреза Фирузжа - Винсент Кеймар
Жавоҳир Синдаров - Хикару Накамура
Фабиано Каруана - Гукеш Доммараджу
Магнус Карлсен - Нодирбек Абдусатторов.

Плей-офф босқичи классик шахматдан иборат бўлади. Шахматчилар ўзаро иккитадан ўйин ўтказишади. Икки ўйиндан кейин дуранг қайд этилса, ғолиб тайбрекда аниқланади.

Эслатиб ўтамиз, мусобақанинг мукофот жамғармаси — 750.000 долларга тенг. Ғолиб шахматчига 200.000 доллар берилади.