Germaniyaning Vayssenxaus shahrida "2025 Freestyle Chess Grand Slam" musobaqasida aylanma tizimi yakuniga yetdi va bugundan pley-off bosqichi start oladi.
Sportchilar kecha rapid yo‘nalishida yana 4 tadan o‘yin o‘tkazishdi. Sindarov va Firuzja 6,5 ochkodan jamg‘arishdi. Fransiyalik shaxmatchi qo‘shimcha ko‘rsatkichlar bo‘yicha birinchi o‘rinni egalladi. Nodirbek Abdusattorov esa 3,5 ochko bilan 7-pog‘onani band etdi.
Qoidaga ko‘ra, aylanma tizimda dastlabki 4 o‘rinni egallagan shaxmatchilar o‘zlar uchun raqib tanlash imkoniyatiga ega bo‘lishdi. Tanlov natijasida quyidagi juftliklar yuzaga keldi:
Alireza Firuzja - Vinsent Keymar
Javohir Sindarov - Xikaru Nakamura
Fabiano Karuana - Gukesh Dommaradju
Magnus Karlsen - Nodirbek Abdusattorov.
Pley-off bosqichi klassik shaxmatdan iborat bo‘ladi. Shaxmatchilar o‘zaro ikkitadan o‘yin o‘tkazishadi. Ikki o‘yindan keyin durang qayd etilsa, g‘olib taybrekda aniqlanadi.
Eslatib o‘tamiz, musobaqaning mukofot jamg‘armasi — 750.000 dollarga teng. G‘olib shaxmatchiga 200.000 dollar beriladi.













