Аёллар футболи бўйича Ўзбекистон чемпионатининг иккинчи босқич ўйинларига йўлланма олган Ғузорнинг “Шўртан-Леди” қизлар жамоаси шу кунларда навбатдаги беллашувларга тайёргарликни давом эттирмоқда.
Гўзал Мухутдинова ва Одил Аҳмедов шогирдлари яқинда иккита ўртоқлик учрашуви ўтказишди. 30 май куни бўлиб ўтган Ўзбекистон ўсмирлар терма жамоаси билан кечган баҳсда қизларимиз 0:5 ҳисобида имкониятни бой беришган бўлса, кеча Чироқчининг “Гули” номли жамоаси билан кечган учрашувда 7:0 ҳисобида зафар қучишди.
Қаршида олиб борилаётган машғулотлар 7 июнга қадар давом этади. Шундан сўнг футболчиларга қисқа муддатли дам берилади ва кейинчалик йиғин яна давом эттирилади. “Шўртан-Леди” ўзининг навбатдаги баҳсини Ўзбекистон Кубоги доирасида 17 ва 19 июнь кунлари Муборакнинг “Машъал-W” жамоасига қарши ўтказади.
