“Ливерпуль” клуби “Ньюкасл”нинг марказий ҳужумчиси Александер Исак хизматларига қизиқиш билдирмоқда. Бу ҳақда журналист Экрем Конур ижтимоий тармоқлардаги саҳифасида хабар бермоқда.

Арне Слот жамоаси мавсум якунида Дарвин Нуньесни алмаштиришни хоҳлайди ва аллақачон ўз трансфер мақсадларини белгилаган. 25 ёшли Исак “Ливерпуль”нинг  марказий ҳужумчи позициясини кучайтириш учун асосий номзодларидан бири сифатида кўрилмоқда.  

Жорий мавсумда швед ҳужумчиси барча турнирларда 28 та ўйинда майдонга тушиб, 19 та гол ва 5 та голли узатма муаллифига айланган. Футболчининг амалдаги шартномаси 2028 йил ёзига қадар мўлжалланган. Transfermarkt портали маълумотларига кўра, унинг бозор қиймати 75 миллион еврони ташкил этади.

Аввалроқ “Ливерпуль” клуби Муҳаммад Салоҳга Саудия клублари қизиқишлари ортгани боис янги шартнома ишлаб чиқаётгани ҳақида хабар берилганди.