ЖЧ-2014 саралаш босқичининг "А" гуруҳидан ўрин олган Қатар-Эрон ўйинидан олдинги матбуот анжуманида форслар бош мураббийи Карлос Кейруш ва жамоа сардори Жавод Некуном иштирок этишди.
"Жамоамиз эртанги ўйинда ғалаба қозонишга тўла тайёр. Бахтимизга таклиф этилган барча футболчилар соппа-соғ ва ўйинга тайёр. Мен бу ўйинда ижобий натижага умид қиляпман. Миллий терма жамоа учун очколар жуда муҳим", дея сўз бошлади Карлос Кейруш.
"Ушбу ўйин Эрон учун муҳим, аммо Қатар учун ундан ҳам муҳимроқ. Олдимизда 3та ўйин қолди. ЖЧ-2014 йўлланмасини қўлга киритиш учун қўлдан келган барча ишни қиламиз", қўшимча қилди мураббий.
Карлос Кейруш Қатар футбол федерациясининг эронликларга муносабатини танқид қилди. Қатар томони Эрон делегациясининг аэропортдан меҳмонхонага етиб олиши учун автобус ажратмаган. "Қатар бизни ҳайрон қолдирди. ЖЧ-2022ни қабул қиладиган бу мамлакат ҳар бир меҳмоннинг талабини қондириши керак", дейди португалиялик мутахассис.