Хитойда футбол бўйича U20 ёш тоифасида ўтаётган Осиё кубогида бугун гуруҳ босқичи якунланади.

Унда “D” гуруҳидан ўрин олган Жанубий Корея – Япония, Сурия – Таиланд терма жамоаларининг учрашувлари бўлиб ўтади.
Кеча “B” ва “С” гуруҳларида сўнгги, 3-тур учрашувлари ташкил этилди. Аниқроқ айтадиган бўлсак, “B” гуруҳида Ироқ ва Иордания терма жамоалари баҳсида ҳисоб очилмади. Саудия Арабистони эса 2:1 ҳисобида КХДР термасини таслим қилди.

Шу тариқа, Саудия Арабистони U20 терма жамоаси 6 очко билан биринчи ўринда чорак финалга чиққан бўлса, Ироқ 5 очко жамғариб, иккинчи поғонада навбатдаги босқичга йўл олди. Иордания 4, КХДР 1 очко билан гуруҳда қолиб кетди. Энди 1/4 финалда Австралия – Ироқ, Хитой – Саудия Арабистони ўзаро рақобатлашади.

Шунингдек, “С” гуруҳида Ўзбекистон ва Эрон U20 терма жамоалари гуруҳ пешқадамлиги учун куч синашди. Унда футболчиларимиз кутилмаганда 2:1 ҳисобида имкониятни бой бериб қўйди ҳамда гуруҳда иккинчи ўринга жойлашди. Бу гуруҳдаги иккинчи ўйинда Индонезия ва Яман жамоалари куч синашди. Баҳсда ҳисоб очилмади ва жамоалар биттадан очко билан гуруҳнинг сўнгги ўринларидан жой олди.

Эслатиб ўтамиз, Осиё кубогининг чорак финалида Фарҳод Нишонов қўл остидаги терма жамоамизга 1/4 финал босқичида “D” гуруҳи ғолиби тўқнаш келади. Эрон эса ушбу гуруҳнинг иккинчи жамоасига қарши ўйин ўтказади.