Xitoyda futbol bo‘yicha U20 yosh toifasida o‘tayotgan Osiyo kubogida bugun guruh bosqichi yakunlanadi.
Unda “D” guruhidan o‘rin olgan Janubiy Koreya – Yaponiya, Suriya – Tailand terma jamoalarining uchrashuvlari bo‘lib o‘tadi.
Kecha “B” va “S” guruhlarida so‘nggi, 3-tur uchrashuvlari tashkil etildi. Aniqroq aytadigan bo‘lsak, “B” guruhida Iroq va Iordaniya terma jamoalari bahsida hisob ochilmadi. Saudiya Arabistoni esa 2:1 hisobida KXDR termasini taslim qildi.
Shu tariqa, Saudiya Arabistoni U20 terma jamoasi 6 ochko bilan birinchi o‘rinda chorak finalga chiqqan bo‘lsa, Iroq 5 ochko jamg‘arib, ikkinchi pog‘onada navbatdagi bosqichga yo‘l oldi. Iordaniya 4, KXDR 1 ochko bilan guruhda qolib ketdi. Endi 1/4 finalda Avstraliya – Iroq, Xitoy – Saudiya Arabistoni o‘zaro raqobatlashadi.
Shuningdek, “S” guruhida O‘zbekiston va Eron U20 terma jamoalari guruh peshqadamligi uchun kuch sinashdi. Unda futbolchilarimiz kutilmaganda 2:1 hisobida imkoniyatni boy berib qo‘ydi hamda guruhda ikkinchi o‘ringa joylashdi. Bu guruhdagi ikkinchi o‘yinda Indoneziya va Yaman jamoalari kuch sinashdi. Bahsda hisob ochilmadi va jamoalar bittadan ochko bilan guruhning so‘nggi o‘rinlaridan joy oldi.
Eslatib o‘tamiz, Osiyo kubogining chorak finalida Farhod Nishonov qo‘l ostidagi terma jamoamizga 1/4 final bosqichida “D” guruhi g‘olibi to‘qnash keladi. Eron esa ushbu guruhning ikkinchi jamoasiga qarshi o‘yin o‘tkazadi.
