Умуман олганда, Австралия учун дуранг натижа умуман ёмон натижадек кўринмаслиги ҳам мумкин. Чунки "кенгурулар" келгуси икки турда ўз майдонларида Иордания ва Ироқни қабул қиладилар. Балки шунинг учунми, терма жамоа бош мураббийи Япония билан ўйиндан кейинги матбуот анжуманида ўз жамоасини ҳам "яхши ўйин кўрсатгани" билан табриклади.

Холгер Осиек (Австралия терма жамоаси бош мураббийи): "Япония терма жамоасининг Бразилияга йўлланма олгани билан табриклайман. Аммо, шу билан бирга ўз футболчиларимни ҳам жуда яхши ўйин намойиш этгани билан қутламоқчиман.

Менимча, бугун жуда юқори савияда ўйин кўрсатдик. Айниқса тактик ҳаракатларимизни аъло баҳолайман. Биз бир бутундай бўлиб ҳимояландик. Бир бутундай бўлиб хужумга ўтдик. Қарши ҳужумлардаги тезлигимиз жуда юқори эди.

Аммо, қачондир бундай қийин ўйинни ютишга жуда яқин келсангу, охир-оқибат гол ўтказиб юборсанг, албатта ҳафсаланг пир бўлади. Бироқ ўйинчиларимга кайфиятни туширмасликларини айтдим. Улар ўзларига кўп савол беравермасликлари зарур. Ўйлайманки, бугунги учрашувдан келгуси икки ўйин учун ўзимизга бўлган катта ишонч тўплаб олдик."