2 ойдан бери Қатар ва Эроннинг ўзаро дуранг ўйнашини тахмин қилиб келдигу, аммо Жанубий Кореянинг Байрутда очко йўқотишини кутмагандик. Кутганимиз рўй бермади — Эрон Доҳадан 3 очко билан қайтди, аммо тақдир бизга бошқа томондан туҳфа тайёрлади. ЖЧга чиқмоқчимисан, марҳамат, Кореяни ют ва ЖЧга муддатидан аввал йўл ол!
Аслида Мундиал чиқадиган жамоа бошқа жамоанинг мағлубияти эвазига эмас, ўзининг ғалабаси эвазига чиқади. Шундай экан, Сеулда қўлга киритилажак ғалаба бизни ЖЧга олиб чиқади.
Демак, Жанубий Кореяни мағлуб этсак, очколаримиз сони 14тага етади. Эрон эса ўз уйида Ливан 3 очко олса, 13 очкога эга бўлади. Жанубий Корея эса 11 очко билан қолади. Сўнгги турда Жанубий Корея ва Эрон ўзаро ўйнайди ва улардан камида биттаси очко йўқотади. Демак, Сеулдан ғалаба билан қайтсак, Қатарга қарши ўйинда қандай натижа қайд этилишидан қатъий назар биз ЖЧга чиқиб бўлган бўламиз.
Энди, Кореяда дуранг қайд этилса-чи? Унда биз сўнгги турда Қатарни мағлуб этсак, албатта Мундиалга борамиз. Боиси, юқоридаги гап. Эрон Ливанни ютса 13 очкога эга бўлади. Ўзбекистон Корея билан дуранг ўйнаб, Қатарни ютганидан кейин 15 очко тўплайди. Сўнгги турда 12 ва 13 очкога эга бўлган Ж.Корея ва Эрон ўзаро тўқнаш келишидан хабарингиз бор.
Лекин Сеулда зинҳор ютқазмаслигимиз керак. Бу вариантни муҳокама қилиш ниятимиз йўқ.