"Реал" ҳужумчиси Винисиус Жуниор Испания Кубоги 1/2 финалидан ўрин олган "Реал Сосьедад"га (1:0) қарши дастлабки ўйинда ирқчилик руҳидаги ҳақоратларга учради, деб ёзади AS. Сан-Себастьян клуби мухлислари 24 ёшли бразилиялик футболчига нисбатан маймунлар имо-ишораларини кўрсатишди.
Винисиус ҳақоратга учраган ягона футболчи эмасди. Ҳимоячи Рауль Асенсиога биринчи бўлимда мухлислар "Асенсио, ўл" деб бақиришди. Унинг ўрнига танаффусда Лукас Васкес ўйинга қўшилди.
Жавоб ўйини 1 апрель куни Мадридда бўлиб ўтади. Яна бир ярим финалда "Атлетико" ва "Барселона" ўйнайди (биринчи ўйин - 4:4).
