"Вест Хэм" ярим ҳимоячиси Лукас Пакетанинг гаровлар бўйича иши бўйича эшитувлар март ойига режалаштирилган, деб хабар беради Sky Sports.
Қайд этилишича, жараён уч ҳафта давом этади.
2024 йил июнь ойида Англия футбол ассоциацияси (FA) ярим ҳимоячини фейр-плейни бузгани ва гаров ўйнагани учун умрбод дисквалификация қилиши мумкинлиги маълум бўлганди. Қайд этилишича, бразилиялик билан боғлиқ 60 га яқин киши сариқ карточкаларга пул тикиб, 100 минг фунтдан ортиқ пул ютиб олган. Футболчининг ўзи унга қўйилган айбловларни рад этмоқда. У ўзининг ҳалол номи учун курашишини айтди.
Пакета 2022 йилдан буён "Вест Хэм" шарафини ҳимоя қилиб келмоқда. Жорий мавсумда 27 ёшли ярим ҳимоячи жамоа сафида барча мусобақаларда 26 та ўйинда майдонга тушиб, 5 та гол уришга эришди.
