"Vest Xem" yarim himoyachisi Lukas Paketaning garovlar bo‘yicha ishi bo‘yicha eshituvlar mart oyiga rejalashtirilgan, deb xabar beradi Sky Sports.
Qayd etilishicha, jarayon uch hafta davom etadi.
2024 yil iyun oyida Angliya futbol assosiasiyasi (FA) yarim himoyachini feyr-pleyni buzgani va garov o‘ynagani uchun umrbod diskvalifikasiya qilishi mumkinligi ma’lum bo‘lgandi. Qayd etilishicha, braziliyalik bilan bog‘liq 60 ga yaqin kishi sariq kartochkalarga pul tikib, 100 ming funtdan ortiq pul yutib olgan. Futbolchining o‘zi unga qo‘yilgan ayblovlarni rad etmoqda. U o‘zining halol nomi uchun kurashishini aytdi.
Paketa 2022 yildan buyon "Vest Xem" sharafini himoya qilib kelmoqda. Joriy mavsumda 27 yoshli yarim himoyachi jamoa safida barcha musobaqalarda 26 ta o‘yinda maydonga tushib, 5 ta gol urishga erishdi.
