“Спортинг” ҳужумчиси Виктор Дьокереш ёзда Португалия клубини тарк этишга қарор қилди. Diario Sport хабарига кўра, футболчи трансфер жараёнини муаммосиз ва тартибли ўтказиш учун клуб билан баъзи тафсилотларни муҳокама қилиб бўлган.

Олдин эришилган келишувга кўра, унинг 100 миллион евро товон пули фақат қишки трансфер ойнаси вақтида амал қилади. Бироқ, агар у мавсум охиригача клубда қолса, ёзги трансфер нархи сезиларли даражада арзонлашишига ҳам қарор қилинган. Натижада манфаатдор клублар энди уни камида 65 миллион евро ва максимал 75 миллион евро эвазига сотиб олишлари мумкин.

Муҳими, агар таклиф минимал миқдорга тўғри келса, Дьокереш ўзининг кейинги клубини танлаш ҳуқуқига эга. Унинг устуворлиги Премьер-лигага қайтиш бўлиши мумкин.

Жорий мавсумда швед “Спортинг” сафида барча турнирларда 40 та ўйинда майдонга тушиб, 39 та гол урди ва 9 та голли узатмага муаллифлик қилган.