Жозе Моуриньо Туркияда яна бир дисквалификацияга дуч келиши мумкин – бу гал ўз сўзлари учун.  

Эслатиб ўтамиз, 27 февраль куни «Фенербахче» бош мураббийи 25-турдаги (0:0) дербидан сўнг «Галатасарой»га нисбатан ирқчилик ва тўртинчи ҳакамни ҳақорат қилгани учун Туркия чемпионатининг 4 та ўйинидан четлатилганди. Шунингдек, у 42 500 евро жаримага тортилган.  

1 март куни Моуриньонинг дисквалификацияси 4 та ўйиндан 2 тагача қисқартирилгани маълум бўлди. Португалиялик мутахассис бу вазиятни қуйидагича изоҳлади: «Дисциплинар қўмитаси раҳбари менинг четлатилишимни "Галатасарой" футболкасини кийиб нишонлади. Фақат шу ердагина бу ҳолатнинг масштабини тушуниш мумкин».

Туркия футбол федерацияси Моуриньога қарши «футбол обрўсига зарар етказадиган баёнотлар» учун шикоят берилганини маълум қилди.  

Sky Sports'нинг хабар беришича, мураббий учун эҳтимолий жазо дисквалификация ва жарима бўлиши мумкин.