"Манчестер Сити" ҳужумчиси Омар Мармуш Чемпионлар Лигаси йўлланмаси учун кураш ҳақида фикр билдирди.

Шанба куни "шаҳарликлар" ўз уйида "Брайтон" билан дуранг ўйнаб (2:2), яна очко йўқотишди. Хосеп Гвардиола жамоаси 48 очко билан бешинчи ўринда бормоқда ва "Челси"дан бир очко ортда қолмоқда. "Аристократлар"нинг 1 та захира ўйини бор. Ундан кейинги ўринларда "Ньюкасл" ва "Брайтон" - 47 очкодан.

"Бу осон чақириқ эмас, лекин биз қўлимиздан келганини қиламиз, бор кучимиз билан ишлаймиз. Умид қиламанки, биз бунга эришамиз. Биз ўзимизнинг кучли жиҳатларимизни тез-тез намойиш этишимиз, тўп билан ишончлироқ ҳаракат қилишимиз ва уни яхшироқ назорат қилишимиз, умуман олганда, "Манчестер Сити" ҳар доим яхши бўлган нарсаларда муваффақият қозонишимиз керак," - дея Мармушнинг сўзларини келтиради клуб матбуот хизмати.