"Ювентус" вингери Франсишку Консейсаунинг келажаги мавҳумлигича қолмоқда. "Кекса синьора" португалияликни жорий мавсум якунига қадар "Порту"дан ижарага олганди. 22 ёшли футболчининг сотиб олиниши деярли ҳал қилинган масала ҳисобланган, буни "бьянконерилар" расмийлари ҳам тасдиқлаган, аммо клуб бош мураббий Тьяго Мотта билан хайрлашиши вазиятни ўзгартириши мумкин. Журналист Маттео Мореттонинг маълум қилишича, "Ювентус" мураббийни алмаштиришга қарор қилса, Консейсауни сотиб олиш масаласи қайта кўриб чиқилади.
Футболчи жорий мавсумда туринликлар сафида 30 та баҳсда 5 та гол урди ва шунча голли узатмани амалга оширди.
