Жаҳон чемпионати саралашининг 3-босқичи 7-туридан ўрин олган учрашувда Ўзбекистон Тошкентда Қирғизистонни кичик ҳисобда мағлуб этди. Ўйиндан кейин ташкил этилган матбуот анжуманида дастлаб меҳмонлар устози Максим Лисицин иштирок этди.

"Ўйиндан кейин футболчиларга жонбозлик кўрсатгани, иштиёқи, муносиб ўйин кўрсатгани учун миннатдорчилик билдирдим. Афсуски, мағлуб бўлдик. Бу биз учун қимматли тажриба бўлди.

Четлатишга тайёр эмасдик. Бунга қандай қилиб тайёр бўлиш ҳам мумкин? Четлатишга қадар рақиб босимни ошириб бораётганди. Ўн киши бўлиб қолганимизда ҳам "сочилиб" кетмадик.

Бугун жисмоний жиҳатдан биз тайёр эдик. Ўн киши бўлиб ҳам охиригача чидаб ўйнаб бера олдик ва рақиб таклиф қилган босимга дош бердик.

Муаммо шундаки, футболчилар ўз клублари сафида турли ҳолатда келмоқда. Биз эса балансни юзага келтиришга ҳаракат қилдик.

Бугун бизга ҳужумни кескинлаштирадиган вазиятлар етишмади. Бунга Ўзбекистоннинг савияси ҳам бизга таъсир кўрсатди.

Даврозабонимиз яхши ўйнади. У ўз клуби сафида ҳам етарли ўйин амалиётига эга бўлмоқда. Кейинги ўйинларда эса футболчиларнинг аҳволидан келиб чиқиб тактика танлаймиз.

Гуруҳда қийин аҳволга тушиб қолдик. Кожо Жоэлни эса кейинги ўйинга сақлаш мақсадида эртароқ захирага олдим", — деди Лисицин.