"Лион" ҳужумкор ярим ҳимоячиси Райан Шерки Европанинг бир қатор грандлари қизиқишида.
21 ёшли футболчининг кетиши ҳақида қишки трансфер ойнасида ҳам, мавсум бошида ҳам фаол хабарлар тарқалди, аммо "Лион" ўсиб бораётган юлдузни сақлаб қолди. Transfer News Live'нинг The Sun'га таяниб хабар беришича, айни дамда "Ливерпуль", "Бавария" ва Дортмунднинг "Боруссия" клублари истиқболли французга қизиқиш билдирмоқда. Келаётган ёзда футболчининг бошқа жамоага ўтиш эҳтимоли жуда юқори, чунки унинг амалдаги шартномаси келаси йили тугайди.
Transfermarkt портали Райан Шеркининг нархини 30 млн еврога баҳоламоқда. Жорий мавсум ҳужумкор ярим ҳимоячи 34 та ўйинда майдонга тушиб, 8 та гол ва 18 та голли узатмани амалга оширди.
