"Ливерпуль" ҳимоячиси Виржил ван Дейк келажаги борасида бир қарорга келди. Fichajes нашри тарқатган хабарга кўра 33 ёшли нидерландиялик футболчи мавсум якунлангач мерсисайдликлар сафини тарк этишга қарор қилган.
Манбанинг таъкидлашича, ван Дейкнинг қарорига "Ливерпуль"нинг сўнгги пайтлардаги муваффақиятсизликлари - Чемпионлар лигасидан чиқиб кетиши ва Англия лига кубоги финалида мағлубиятга учраши таъсир қилган.
Шу тариқа, ёзда Виржил ван Дейк эркин агент мақомига эга бўлади ва бошқа клубга текинга кўчиб ўтиши мумкин.
Ёзги трансферлар вақтида ван Дейкни "ПСЖ" ўз сафига қўшиб олишга уриниб кўради - Лига 1 гранди бу борада музокараларни бошлаб юборган.
Виржил ван Дейк 2018 йил бошидан бери "Ливерпул"да ўйнамоқда.
