"Милан"да ижара асосида тўп тепаётган "Челси" ҳужумчиси Жоау Феликс яна бир бор жамоасини ўзгартириши мумкин.
"Россонерилар" ҳужумчини сотиб олиш имкониятига эга эмас ва келаси ёзда трансферни амалга ошириши даргумон, "Челси" ҳам португалияликнинг жамоадаги келажагига ишончи комил эмас. Бу орада, Milan Posts нашрининг хабар беришича, Феликснинг агенти Жорже Мендеш агар турк клуби лондонликлар билан келиша олса, унинг мижози "Галатасарой"га ўтишини маълум қилган.
Жоау Феликснинг "Челси" билан шартномаси 2031 йилгача мўлжалланган. Transfermarkt портали баҳосига кўра, 25 ёшли футболчининг нархи 25 млн еврони ташкил этади.
