Стефано Пиоли "Ан-Наср"ни тарк этиб, "Рома"ни бошқариши мумкин.
SportItalia нашрининг хабар беришича, мураббийнинг Саудия Арабистони клубида қолиши критик нуқтага етган кўринади. Италиялик мутахассис майдонда ҳам, жамоа билан ўзаро муносабатларда ҳам қийинчиликларга дуч келмоқда.
Шу аснода "Милан"нинг собиқ мураббийи Италияга қайтиши мумкинлиги ҳақида миш-мишлар кўпаймоқда. Унинг номи А Сериянинг бир нечта клублари, жумладан, "Рома" билан боғланган. Таъкидланишича, Пиоли мавсум охирида Клаудио Раньери кетганидан кейин римликларнинг асосий номзодларидан бири бўлади.
Қайд этилишича, сўнгги вақтларда сентябрь ойида тайинланган Пиоли ва ҳужумчи Криштиану Роналду ўртасида келишмовчилик юзага келиши мумкинлиги ҳақида миш-мишлар кўпайган. Бу ички қарама-қаршиликлар ва кутилган натижалар мураббийнинг "Ан-Наср"даги мавқеини шубҳа остига қўйди.
Бироқ Пиолининг ишини баҳолашга биринчи навбатда чемпионатдаги вазият таъсир қилади. Жамоа жадвалда 3-ўринни эгаллаб, пешқадам "Ал-Иттиҳод"дан 10 очко, 2-ўриндаги "Ал-Ҳилол"дан эса 6 очко ортда қолмоқда.
