Stefano Pioli "An-Nasr"ni tark etib, "Roma"ni boshqarishi mumkin.
SportItalia nashrining xabar berishicha, murabbiyning Saudiya Arabistoni klubida qolishi kritik nuqtaga yetgan ko‘rinadi. Italiyalik mutaxassis maydonda ham, jamoa bilan o‘zaro munosabatlarda ham qiyinchiliklarga duch kelmoqda.
Shu asnoda "Milan"ning sobiq murabbiyi Italiyaga qaytishi mumkinligi haqida mish-mishlar ko‘paymoqda. Uning nomi A Seriyaning bir nechta klublari, jumladan, "Roma" bilan bog‘langan. Ta’kidlanishicha, Pioli mavsum oxirida Klaudio Ranyeri ketganidan keyin rimliklarning asosiy nomzodlaridan biri bo‘ladi.
Qayd etilishicha, so‘nggi vaqtlarda sentyabr oyida tayinlangan Pioli va hujumchi Krishtianu Ronaldu o‘rtasida kelishmovchilik yuzaga kelishi mumkinligi haqida mish-mishlar ko‘paygan. Bu ichki qarama-qarshiliklar va kutilgan natijalar murabbiyning "An-Nasr"dagi mavqeini shubha ostiga qo‘ydi.
Biroq Piolining ishini baholashga birinchi navbatda chempionatdagi vaziyat ta’sir qiladi. Jamoa jadvalda 3-o‘rinni egallab, peshqadam "Al-Ittihod"dan 10 ochko, 2-o‘rindagi "Al-Hilol"dan esa 6 ochko ortda qolmoqda.
