Ўзбекистон аёллар терма жамоаси Осиё кубоги-2014 йўлланмасини қўлга кирита олмади. Терма жамоамиз ҳал қилувчи баҳсда асосий рақибга имкониятни бой беришди.

Гуруҳнинг аввалги баҳсларида Иордания терма жамоаси Ливан ва Кувайт жамоаларини Владислав Хан шогирдларига нисбатан йирикроқ ҳисобида ютгани учун сўнгги баҳсда мезбонларни дуранг натижа ҳам қаноатлантирарди. Натижада Ўзбекистонга қарши ўйинда улар қарши ҳужум тактикасини танлашди ва 1 соат давомида қизларимизнинг чарчашини кутишди.

Терма жамоамиз мезбонларнинг ҳимоя чизиғини ёриб ўта олишмади. Ўйиннинг сўнгги 30 дақиқаси давомида эса ўз дарвозаларидан 4та гол ўтказиб юборишди. Айниқса, 57 ва 58-дақиқаларда киритилган 2та гол Хан шогирдларининг умидини бир пасда сўндириб қўйди.

Иордания терма жамоаси эса келаси йили Вьетнамда бўлиб ўтадиган Осиё кубогида қатнашиш ҳуқуқини қўлга киритди.

Умуман олганда, терма жамоа мазкур саралаш босқичига етарли тайёргарлик кўра олмади. Саралаш ўйинлари бошланишига 10 кун қолганида таркиб йиғилди ва 2 марта Ўзбекистон ўсмирлар (U16) терма жамоаси билан ўртоқлик ўйинини ўтказиб, Иорданияга йўл олди. Иорданияликлар эса миллий чемпионат баҳсларини март ойида тўхтатиб қўйиб, 2 ой давомида терма жамоани саралаш баҳсларига қаттиқ тайёрлашди. Улар Вьетнам билан бир нечта ўртоқлик ўйинларида иштирок этишди.