ЖЧ-2014 саралашининг 4-босқич, 9-туридан ўрин олган Жанубий Корея ва Ўзбекистон миллий терма жамоалари ўртасидаги баҳсдан олдинги матбуот анжуманининг иккинчи қисмида мезбонлар бош мураббийи Чой Канг Хи иштирок этди. Мураббий билан бирга матбуот анжуманига "Гамбург" футболчиси Сон Хеунг Мин ташриф буюрди.

— Биз эртанги ўйинга яхши тайёргарлик кўрдик. Футболчилар ўйинга тайёр. Фақат буни майдонда исботлашлари керак. Ўйинчилар берган кўрсатмаларимга амал қилишади, деб умид қиламан. Эртанги баҳсни интизорлик билан кутяпмиз, — дейди Чой Канг Хи.

— Эртага Сон Хеунг Мин майдонга тушадими?
— Барча футболчилар ўйинга яхши тайёргарлик кўришди, жумладан, Сон Хеунг Мин ҳам. У Қатарга қарши ўйинда фаол ҳаракат қилганди. Агар эртага унга имконият берилса, у ўз имкониятидан фойдаланади деб ўйлайман.

— Эртага Ўзбекистон ҳужумкор тактика танлаши мумкин. Жамоа ҳимояланишга ҳам тайёрми?
— Ҳа, машғулотлар жараёнида бунинг устида ҳам ишладик. Биз ўйинда тўпни назорат қилишга ҳаракат қиламиз. Эртанги ўйинда биз аввал учрашувларда йўқотилган очколар ўрнини тўлдиришимиз керак. Бу сафар аввалги ўйинларимизга нисбатан яхшироқ ўйнаймиз.

— Россия чемпионатида тўп сураётган Одил Аҳмедовнинг фаоллигини пасайтириш бўйича қандайдир чоралар ўйлаб қўйдингизми?
— Ушбу футболчи ўйнайдими ёки йўқми, биз учун катта аҳамиятга эга эмас. Ўзбекистон ҳозир кўтарилишда. Боз устига, Ўзбекистон сафардаги ўйинларда ғалаба қозонмоқда. Лекин биз ҳам ўз уйимизда бутунлай бошқача ўйин намойиш қиламиз. Замонавий футболда легионер футболчиларнинг ўрни катта. Бизда эса бундай футболчилар кўпчиликни ташкил қилади.