Германиянинг собиқ ҳужумчиси ва миллий терма жамоасининг аввалги мураббийи Юрген Клинсманн 2006 йилги жаҳон чемпионати ярим финалида Италия ва Германия терма жамоалари ўртасидаги афсонавий ўйинни хотирлади. Германия терма жамоаси 2000 йилларнинг бошидаги муваффақиятсизликлардан сўнг анча ёшартирилган таркиб билан майдонга чиққан эди ва Клинсманн буни муҳим омил деб ҳисоблайди. Унинг таъкидлашича, италияликлар анча тажрибали бўлишган.
"Жамоамиз ёш эди, уни шакллантириш учун атиги икки йил вақтимиз бор эди. Шунча йил ўтгач, ҳозир нима дея оламан? Италия биздан яхшироқ ўйнади, уларнинг таркибида етукроқ, тажрибалироқ футболчилар ва мос даражадаги мураббий - Марчелло Липпи бор эди," - дея Клинсманннинг сўзларини келтиради pianetamilan.it.
