Иньиго Мартинеснинг "Осасуна" билан ўйиндаги иштироки бўйича қарор кечиктирилди.
Эслатиб ўтамиз, "Барселона" 27 март куни Памплона жамоаси устидан 3:0 ҳисобида ғалаба қозонганди.
Эртаси куни "Осасуна" футболчининг "Барселона" таркибида нотўғри иштирок этгани учун Испания Қироллик Футбол Федерациясига (RFEF) апелляция берди. Клубнинг фикрича, Иньиго Мартинеснинг ушбу ўйинда майдонга тушиши футболчиларнинг мақоми ва трансферлари бўйича ФИФА Регламентининг I иловаси 5-моддасини бузади.
Унга кўра, тиббий сабабларга кўра миллий терма жамоага қўшилмаган ёки уни тарк этган футболчи халқаро давр тугагандан кейин 5 календарь кун давомида ўз клуби сафида тўп тепиши мумкин эмас.
Ушбу иш бўйича қарор бугун қабул қилиниши режалаштирилган эди, аммо уни кўриб чиқиш ҳали бироз вақт олади. Интизомий орган ҳали ҳам олинган ҳужжатларни ўрганмоқда.
