Жанубий Корея - Ўзбекистон (1:0) ўйинидан кейинги матбуот анжуманида дастлаб Миржалол Қосимов иштирок этди.

— Жанубий Корея терма жамоасини ғалаба билан табриклайман. Ҳа, бугун биз ютқаздик, аммо ҳали ЖЧга чиқиш учун имкониятларни йўқотмадик. Кучли рақибга қарши қийин ўйин бўлди. Корея 18 июнь куни Эронни қабул қилади. Ўша ўйинда мезбонлар ғалаба қозонишади деган умиддаман. Ўз навбатида биз ҳам Қатарни ютишга ҳаракат қиламиз. Жанубий Корея профессионал жамоа. Улар Эронга қарши худди бугунгидек яхши ўйин кўрсатишига умид қиламан.

— Қатарга қарши ўйинда вазиятни ўнглашга ҳаракат қилишингиз керак.
— Бугунги мағлубият учун сабаб қидирмоқчи эмасман. Футбол жамоавий ўйин. Футболда хатолар бўлиб туради. Бир ёки икки кишининг хатоси мағлубиятга бутунлай сабаб бўла олмайди. Биз бугунги ўйиннинг видеоёзувини кўриб чиқамиз ва хатолардан хулоса чиқарамиз.

— Ўйинчи алмаштиришларни кеч амалга оширмадингизми?
— Бундай деб ўйлаймайман. Бугун мақсадимиз ғалаба қозониш бўлгани билан кўп тўп ўтказиб юбормаслигимиз керак эди. Бу тўплар нисбатига салбий таъсир кўрсатади. Шуни инобатга олган ҳолда ўйинчи алмаштирдим.