Профессионал боксдаги вакилимиз Шаҳрам Ғиёсов аргентиналик Франко Окампони тўртинчи раундда техник нокаутга учратди. Ҳамюртимиз энди IBF ва WBA версиялари бўйича ярим ўрта вазн тоифасидаги Жарон Эннис ва Эймантас Станионис ўртасидаги чемпионлик жанги ғолиби билан тўқнаш келиш имкониятини қўлга киритди.

WBA камарининг мажбурий даъвогари бўлган Ғиёсов, март ойи охирида ёш қизи вафот этганига қарамай, жанг қилишга қарор қилди.

Жангача Окампо белгиланган вазндан уч фунт оғир келгани боис, уни енгиш янада қийинлашди. Бироқ Ғиёсов жанг давомида устунликни қўлга киритиб, тўртинчи раунднинг 1-дақиқа 57-сониясида рақибни тўхтатишга эришди. Жанг Atlantic City’даги Boardwalk Hall аренасида бўлиб ўтди.

Биринчи раунд охирида Ғиёсов ўнг қўл билан бошга, кейин эса чап ва ўнг зарбалар билан баданга зарба берди. Улар чап қўл зарбалари билан алмашишди ва бу Окампони қийин аҳволга солди. Шу пайтда Ғиёсов ўнг қўли билан уни биринчи марта ерга йиқитди.

31 ёшли Ғиёсов иккинчи ва учинчи раундларда ҳам устунликни сақлаб қолди. У бошга ҳам, баданга ҳам аниқ зарбалар йўллади ва баъзан "жеб" зарбалари билан Окампонинг бошига зарба берди.

Тўртинчи раунд бошиданоқ у агрессив ҳаракатларни давом эттирди, лекин сабрни ҳам йўқотмади. Унинг баданга йўллаган ўнг қўл зарбаси натижасида Окампо яна ерга йиқилди ва жангни давом эттириш нияти йўқлигини ҳаракатларидан англаш мумкин эди. Шунинг учун унинг бурчагидагилар ҳакам Дэвид Франчиозига жангни тўхтатишни айтди.

“Мен учун жуда-жуда оғир,” – деди Ғиёсов. “Бу йиғин жуда қийин бўлди, чунки қизимни йўқотдим. У мени кўряпти. У ҳозир мени кузатяпти. У мен учун дуо қиляпти. Мен унга ваъда бергандим... Мен уни севаман.”

Шу сўзлардан кейин залда тўпланган мухлислар уни олқишлаб юборишди ва бу ҳол Ғиёсовни кўз ёш тўкишга мажбур қилди.

“Бу жанг қизим учун,” – деди у ҳис-туйғуларга тўлиб. “Кейинги жанг – мен қизимга жаҳон чемпиони бўлишимни ваъда қилганман. У менга ишонган. Мен бунга ишонаман. Менга имконият беринг, мен уддалайман”.