Эронда ўтмишнинг машҳур футболчиларидан бири, кейинчалик мураббий сифатида узоқ йиллар давомида Эрон миллий терма жамоасида ишлаган Али Парвин ЖЧ-2014 саралашининг 9-туридан кейин ўз фикрлари билан ўртоқлашди.

"Ливанга қарши ўйин осон бўлмаслигини билардик. Танаффусга гол ура олмай чиқиб кетишимизга сал қолди. Ўйиннинг бошиданоқ ливанликлар ётиб олаверганига асабга тегди. Футболчиларимизнинг тажрибаси эвазига рақиб дарвозасига 4та гол уришга муваффақ бўлдик", дейди Парвин.

"Энди биз Қатарнинг Тошкентдаги ўйинига умид қилмасдан, Кореяда ғалаба қозониш ҳақида ўйлашимиз керак. Қатар ҳам Ўзбекистон билан ўйинда қўлидан келганича ўйнайди. Йигитлар Кореяни ютиш ҳақида ўйлаб, Ўзбекистон-Қатар ўйинини шунчаки расмиятчиликка айлантириб қўйишлари керак", дейди мутахассис.

"Мен Кореянинг сўнгги бир нечта ўйинларинии кўрдим. Улар ҳам аввалгидек зўр ўйнашаётгани йўқ. Уларни енгса бўлади. Лекин кореяликлар ҳам Теҳрондаги мағлубият учун қасос олишлари ҳақида баёнот беришди. Корея, шубҳасиз, яхши жамоалардан бири. Аммо улар бизга қарши ҳар доим ҳам яхши ўйнай олишмайди. Тезкор Кореяга қарши ўйинда гол ура олишимизга ишонаман", дейди у.

"Корея билан ўйинга тайёргарлик кўриш учун бизда вақт бор. Умид қиламан, биз Бразилия йўлланмасини Кореяда расмийлаштирамиз. Терма жамоа Теҳронга қайтганидан кейин эса "Озодий" стадионида 100 минг мухлис қаршисида уларни ЖЧ йўлланмаси билан табриклаймиз", дейди Али.

"Карлос Кейруш Қатарга қарши қўллаган услубини Кореяга қарши ўйинда ҳам қўлласа тўғри бўлади. Футболчилар Корея билан ўйинга катта иштиёқ билан чиқиб, халқимиз интизорлик билан кутаётган байрамни тақдим этишади, деб ўйлайман", дейди Али Парвин.