Футзал бўйича Ўзбекистон кубоги Б гуруҳи 2-тури доирасида "Бунёдкор" "Максам Чирчиқ" билан баҳс олиб борди ва 1:1 ҳисобида дуранг ўйнади.
Ўйиндан сўнг "Максам Чирчиқ" жамоаси бош мураббийи Баҳодир Аҳмедов фикр билдирди.
"Учрашув жуда қизиқарли ўтди. Ҳар иккала жамоа ғалаба учун тўп тепди. Аммо якунда кучлар тенг келди. “Бунёдкор”га раҳмат айтмоқчиман, жуда яхши ўйин кўрсатди. Бизнинг биринчи таймда ўйинимиз чиқмади.
Танаффусдан кейин ташаббусни қўлга олишга эришдик. Шунинг натижасида мағлубиятдан қутилиб қолдик. Жамоамизнинг икки нафар этакчи ўйинчиси – Ботир Ризаев ҳамда Тоҳир Абдукаримовлар жароҳат олишган.
Шу сабаб майдонга туша олишмади. Аммо жамоамиз билан Жиззахга бирга келишди ва йигитларни қўллаб қувватлаб туришди. Насиб қилса, чорак финалга чиқсак, улар сафга қайтишига умид қиламан. Биз ҳар ўйинга ғалаба учун майдонга чиқамиз. Ортга чекинишга йўл йўқ. Плей-оффга чиқиш учун кейинги учрашувларда бизни фақат ғалаба қаноатлантиради.
