"Манчестер Юнайтед" ҳимоячиси Диого Далот болдиридан жароҳат олди ва АПЛнинг 34-турида "Борнмут"га қарши ўйинда майдонга тушмайди.
Бу ҳақда “қизил иблислар” бош мураббийи Рубен Аморим ўйиндан олдинги матбуот анжуманида маълум қилди.
"Бу жароҳат уни мавсумнинг қолган қисмида ўтказиб юбориши мумкинми? Бу мумкин, лекин мен билмайман. Биз унинг ҳолатини ҳар ҳафта кузатиб борамиз, чунки у жуда қаттиқ ишлайди ва яхши тузалиб кета олади, шунинг учун кўрамиз", деди Аморим.
Жорий мавсумда 26 ёшли португалиялик футболчи клуб сафида барча турнирлар доирасида 51 та ўйинда майдонга тушиб 3 та гол урди ва 5 та голли узатмани амалга оширди.
