31 ёшли марказий ҳимоячи Эрик Дайер жорий мавсум якунида «Бавария» клубини тарк этиб, «Монако» жамоасига ўтади. Бу ҳақда инсайдер журналист Фабрицио Романо ижтимоий тармоқда хабар берди.

Манбаларга кўра, англиялик футболчининг янги жамоа билан шартномаси 2027 йил ёзигача мўлжалланган бўлади. Шунингдек, унга келишувни бир мавсумга узайтириш имконияти ҳам қўшилади. Дайернинг «Бавария» билан амалдаги шартномаси шу ёзда якунланади.

Эслатиб ўтамиз, Эрик Дайер ўтган йилнинг июнида «Бавария»га доимий равишда ўтган эди. Жорий мавсумда у барча мусобақаларда 25 та учрашувда қатнашиб, 2 та гол ва 1 та голли узатма билан иштирок этди.

Transfermarkt портали маълумотига кўра, футболчининг бозор қиймати 8 миллион еврони ташкил этади.