“Интер” жамоаси икки йиллик танаффусдан сўнг яна Чемпионлар Лигаси финалига йўл олди. Симоне Индзаги бошчилигидаги жамоа ярим финалда “Барселона”ни мағлуб этди: биринчи ўйинда 3:3, жавоб баҳсида эса 4:3 ҳисобида зафар қучди.
Финалда “нерадзуррилар” “ПСЖ” ёки “Арсенал” жамоаларидан бири билан тўқнаш келади. Мазкур баҳс 31 май куни Мюнхенда бўлиб ўтади.
Бу “Интер” тарихидаги 7-финал бўлади (ЕЧЛ ва Европа чемпионлар кубоги доирасида). Илгари жамоа уч марта ғалаба қозонган ва уч марта финалда мағлуб бўлган. Энг сўнгги финал 2023 йилда “Манчестер Сити”га қарши ўтказилган бўлиб, ўша учрашувда “Интер” 0:1 ҳисобида мағлубиятга учраган эди.
