УЕФА Европа Лигаси ярим финал жавоб баҳси якунланди. Унда "Манчестер Юнайтед" ўз майдонида Бильбаонинг "Атлетик" жамоасини қабул қилди. Учрашув Англиядаги “Олд Траффорд” стадионида бўлиб ўтди. Учрашув "Манчестер Юнайтед"нинг 4:1 ҳисобидаги ғалабаси билан якунланди. Иккала учрашув натижасига кўра “қизил иблислар” 7:1 ҳисобида зафар қучди ва мусобақа финалига йўл олди.

Учрашувнинг 31-дақиқасида «Атлетик» ярим ҳимоячиси Микель Хаурехисар ҳисобни очди. 72-дақиқада "Манчестер Юнайтед" футболчиси Мэйсон Маунт ҳисобни тенглаштирди. 80-дақиқада Каземиро жамоасини олдинга олиб чиқди. 85-дақиқада Расмус Хойлунд ҳисобни 3:1га етказди. 90+1-дақиқада Маунт дублини расмийлаштирди.

Жамоалар ўртасидаги илк учрашув 1 май куни Испанияда бўлиб ўтган эди. Ўшанда “Манчестер Юнайтед” 3:0 ҳисобида йирик ғалабани қўлга киритган. Бу баҳсда "қизил иблислар" сафида Каземиро ва дубль қайд этган Бруну Фернандеш гол муаллифи бўлган эди.

Европа лигаси. Ярим финал. Жавоб учрашуви
2025 йил 8 май, пайшанба.
Манчестер Юнайтед (Манчестер, Англия) – Атлетик Б (Бильбао, Испания) — 4:1
Голлар:
0:1 — Хаурехисар (31')
1:1 — Маунт (72')
2:1 — Каземиро (80')
3:1 — Хойлунд (85')
4:1 — Маунт (90+1')