Ўзбекистон Суперлигасининг 9-туридан ўрин олган “Навбаҳор” – “Хоразм” жамоалари ўртасидаги учрашув арафасида “лочинлар”нинг 25 ёшли ярим ҳимоячиси Шоҳмалик Комилов бўлажак ўйин ҳақидаги фикрлари билан ўртоқлашди.

- Бўлажак рақибимиз “Хоразм” гарчи узоқ йиллик танаффусдан сўнг, Суперлигага қайтган бўлсада, жорий мавсумда яхши ўйин намойиш этиб, етакчи жамоалардан ҳам очко олишга интилмоқда. Албатта, урганчликлар жамоамизга ҳам муносиб қаршилик кўрсатишга интилишади. Бу эса бўлажак учрашувнинг кескин курашлар остида, шиддатли, томошабоп ўтишини таъминлайди, деган умиддаман. Бир сўз билан айтганда, бўлажак ўйиннинг курашларга бой тарзда кечиши эҳтимоли юқори.   

Урганчликлар билан бўладиган беллашувда майдонга ғалаба иштиёқида тушиб, мухлисларга қувонч улашиш, зафар қучиш учун барча имкониятимизни ишга соламиз.
Ишқибозлардан эса жамоамизни бевосита стадионда муносиб тарзда қўллаб-қувватлаб, ғалабамизга мададкор бўлишларини сўраб қоламан.

Биз эса уларнинг ишончларини оқлаш, уйларига хурсанд ҳолда қайтишлари учун рақибни мағлубиятга учратишга ҳаракат қиламиз, - деди Шоҳмалик Комилов.