Иордания миллий терма жамоаси бош мураббийи Аднан Ҳамад терма жамоа билан шартномасини бошқа узайтирмаслигини маълум қилди ва истеъфога чиқди. Бу ҳақда «AmmonNews» нашри хабар тарқатди.
Ҳамад Уммон терма жамоасига қарши саралаш босқич сўнгги тур учрашувидан кейинги матбуот анжуманида бу борада эълон қилди. Ироқлик мураббий Иордания терма жамоасининг шу кунга қадар кўрсатган натижаларидан фахрланишини ҳам таъкидлаб ўтди. Айниқса жамоа ЖЧ саралашининг сўнгги босқичдаги қийин йўлда учинчи ўринни қўлга киритгани Ҳамадни қониқтирган.
Ҳамад Иордания терма жамоаси бошқарувига 2009 йилнинг февраль ойида келганди. Бу давр мобайнида у жамоани Осиё Кубогида чорак финалга қадар, ЖЧ саралашида эса плей-оффга қадар етиб боришига ҳисса қўшди. Уммон устидаги ғалабадан кейин Иордания энди плей-оффда Ўзбекистон терма жамоасига қарши майдонга чиқадиган бўлди.
Эслатиб ўтамиз, Ўзбекистон ва Иордания терма жамоалари ўртасидаги учрашуви 6 сентябрь куни Аммонда, 10 сентябрь куни эса Тошкентда бўлиб ўтади.
