Сон Хён Мин "Тоттенхэм"нинг Европа Лигасидаги ғалабасидан кейин медаль ололмади.
Кеча Лондон клуби финалда "Манчестер Юнайтед"ни мағлуб этиб (1:0), совринга эга чиқди.
Тақдирлаш маросимида медаллар "Тоттенхэм"нинг барча ўйинчиларига берилмасидан олдин тугади. Кейинчалик УЕФА муаммо клуб мукофотни олиш учун жуда кўп одам юборгани туфайли юзага келганини маълум қилди.
Қайд этилишича, иккала клубга ҳам саҳнада фақат 30 тадан медаль тақдим этилиши ҳақида маълумот берилган. Яна 20 таси ўйинчилар ва ходимларга тарқатиш учун маросимдан сўнг клубга топширилади.
Сон майдонда ўз медалини ололмаган кам сонли футболчилардан бири эди.
"Етишмаётган медаллар зудлик билан ғолиб жамоага кийиниш хонасига етказилди, йўл қўйилган хато учун самимий узр сўраймиз," - дейилади УЕФА хабарида.
